ЗОШТО ТРЧАЊЕТО Е ЕДНА ОД НАЈДОБРИТЕ СПОРТСКИ АКТИВНОСТИ
Трчањето е една од најпопуларните форми на физичка активност. Околу една од пет личности трча (или џогира) во некоја фаза од својот живот. Трчањето е привлечна вежба бидејќи не е премногу скапа и можете да трчате во време кое вас ви одговара.
Некои тркачи одлучуваат да учествуваат во рекреативни трки, натпреварувачки трки или маратони.
Здравствени придобивки од трчањето и џогирањето
Редовното трчање нуди многу здравствени придобивки. Трчањето може:
• да помогне во градењето силни коски
• да ги зајакне мускулите
• да ја подобри кардиоваскуларната кондиција
• да согори многу енергија
• да помогне во одржувањето на здрава тежина.
Неактивниот начин на живот е поврзан со поголема смртност, коронарна артериска болест, хипертензија и мозочен удар. Исто така е главна причина за голем дел хронични заболувања, бидејќи телото брзо се прилагодува на недоволна физичка активност, што доведува до значително намалување на квалитетот на животот.
Редовната физичка активност како што е трчањето може значително да го подобри менталното здравје, самодовербата, здравото стареење и квалитетот на животот.
Разликата помеѓу трчање и џогирање
Разликата помеѓу трчање и џогирање е интензитетот. Трчањето е побрзо, користи повеќе енергија и бара поголем напор од срцето, белите дробови и мускулите отколку џогирањето. Трчањето бара повисоко ниво на целокупна кондиција отколку џогирањето.
И трчањето и џогирањето се форми на аеробни вежби. Аеробно значи „со кислород“- терминот „аеробни вежби“ се однесува на секоја физичка активност што произведува енергија со комбинирање на кислородот со гликозата во крвта или телесните масти.
